Minne Und Treue

Wie sich minne hebt daz weis ich wol
wie si ende nimt des weiz ich niht
ist daz ich es inne werden sol
wie dem herzen herzeliep geschiht
sô bewar mich vor dem scheiden got
daz waene bitter ist:
disen kumber fürhte ich âne spot
disen kumber fürhte ich âne spot

"Swâ zwei herzeliep gefriunded sich
unde ir beider minne ein triuwe wirt
die sol niemen scheiden, dunket mich
al die wîle unz sî der tôt verbirt:
waere diu rede mîn, ich taete alsô:
verlüre ich mînen friunt
seht, sô wurde ich niemer mêre frô
seht, sô wurde ich niemer mêre frô

Dâ gehoeret manic stunde zuo
ê daz sich gesamne ir zweier muot
dâ daz ende denne unsanfte tuo
ich waene des wol, daz ensî niht guot
lange sî ez mir vil unbekant!
und werde ich iemen liep
dér sî sîner triuwe an mir gemant
dér sî sîner triuwe an mir gemant."

Der ich diene und iemer dienen wil,
diu sol mîne rede vil wol verstân.
spræche ich mêre, des wurd alze vil.
ich wil ez allez an ir güete lân.
ir genâden der bedarf ich wol.
und wil si, ich bin vrô;
und wil si, so ist mîn herze leides vol.
und wil si, so ist mîn herze leides vol.